На партале Strony Kamińskich (kami.net.pl) ёсць цікавы раздзел “База крэсовых мясцовасцяў”. Ён змяшчае спіс усіх населеных пунктаў на тэрыторыі ўсходніх ваяводстваў ІІ Рэчы Паспалітай, сістэматызаваны паводле тагачаснага адміністрацыйнага і касцёльнага падзелу.
Сэрвіс мае таксама магчымасць пошуку па назве населенага пункта.
Найбольшая каштоўнасць рэсурса – тое, што кожнае паселішча прывязанае да тапаграфічнай карты маштабу 1:100 000 (1 см адпавядае 1 км), створанай у пачатку 1930-х польскім Вайсковым Інстытутам Геаграфічным (WIG).
Спісы паселішчаў ІІ Рэчы Паспалітай і карты WIG’а не з’яўляюцца сенсацыяй для краязнаўцаў. Пералікі населеных пунктаў са статыстычнымі звесткамі на 1921 і 1938 гады размешчаныя на старонках польскіх сеціўных бібліятэк, а тапаграфічныя карты даўно сабраныя на адмысловым сайце. Затое цяпер лакалізаваць кожны населены пункт можна з дапамогай некалькіх клікаў мышкі.
Некалькі год ужо існуе беларускі рэсурс Radzima.net, на якім, акрамя спісу паселішчаў паводле стану на 1938 год, ёсць магчымасць пакідаць каментары, нататкі, фотаздымкі. Багата жыхароў замежжа, чые продкі паходзяць з нашага краю, пакідаюць паведамленні, жадаюць даведацца пра вёскі, адкуль іх дзяды, і пра сваякоў, якія засталіся жыць на радзіме.
Для тых, хто цікавіцца гісторыяй роднага краю, могуць быць карысныя статыстычныя матэрыялы, якія публікаваліся ў міжваеннай Польшчы. Пералік населеных пунктаў 1921 года дае звесткі па колькасці гаспадарак, насельніцтва, канфесійным і нацыянальным яго складзе.
Даведнік па населеных пунктах 1938 года падае звесткі аб адміністрацыйным падзеле, колькасці гаспадарак і жыхароў, а таксама замацоўвае адзіны варыянт напісання назваў паселішчаў (падаючы пры гэтым іншыя варыянты).
Wykaz miejscowości Rzeczypospolitej Polskiej. T. 1, Województwo wileńskie
Кожны населены пункт можна знайсці на тапаграфічных картах маштабу 1:100 000, якую выдаваў Вайсковы Інстытут Геаграфічны.